Yan ang kadalasan nating sinasabi sa mga taong naghihintay sa atin sa isang lugar para mabigyan sila ng kasiguruhan na papunta na nga tayo sa pinag-usapang tagpuan. Pero kadalasan din e sinasabi natin ito kahit hindi pa naman nakakaalis ng bahay. Ayon sa natuklasan ng staff ng blog na ito, mayroong 276,236 na kompirmadong gumagawa nito sa kasalukuyan.

Natanim na sa isipan nating mga Pilipino na ang pagiging huli sa pagdating sa isang pupuntahan ay normal na at parte na ng kaugalian natin. Sa totoo lang, isa itong napakalaking kabobohan sa ating panig. Namana lang natin ito noong panahon ng mga Kastila at hanggang ngayon ay parang napamahal na sa atin ang ugaling ito.

Hindi ko alam sa iba pero hindi talaga maganda sa pakiramdam ang mahuli sa isang appointment. Kahit na hindi pormal na pagkikita e ayaw ko nang ako ay nahuhuli, at lalo nang ayaw ko na ako ay maghihintay para sa aking katatagpuin. Pero maliban sa personal na prinsipyo e pangit talaga yung parati tayong nahuhuli sa mga dapat puntahan. Kahit na simpleng pagkikita n’yo lang ng mga kaibigan ninyo, hindi pa din ito maganda. Syempre pwede naman palampasin yan ng mga kaibigan mo. At minsan siguro ay ganun din sila. Pero sa mga mas seryosong bagay e pangit ito. Kagaya na lang kung nahuli ka sa trabaho o sa isang panayam, hindi ito maganda bilang imahe ng iyong propesyonal na buhay.

Hindi lang sa mga pupuntahan ito pwedeng maisabuhay. Kasama na din dito ang mga deadline sa trabaho o mga proyekto. Mas maganda kung habang marami pang oras ay gawin na ang dapat gawin para hindi tayo nagmamadali kapag malapit na ang takdang oras.

Disiplina lamang ang pwedeng pairalin para maiwasan natin ang mahuli sa kung ano mang dapat puntahan o gawin. Ayus lang siguro kung hindi naman palagi at meron kang maayos na dahilan kagaya ng nabaril ka sa paa, sumabog ang sinasakyan mong bus, nanakaw ang computer,  o kaya e natapunan ka ng sabaw sa karinderya nang kumain ka ng agahan. Basta kung alam mong magkakaroon ng abala sa pagpunta mo e sikapin mong agahan ang pagpunta. O kung sa gagawin naman ito ay huwag na magsayang ng oras sa hindi mahahalagang bagay.

Magandang maging prinsipyo ang pagiging nasa oras. Mapipilitan ang mga kausap mo na maging maaga ren sa mga lakad nila. At pinapakita din nito ang pagiging responsable mo hindi lang bilang isang propesyonal kundi bilang isang tao.

Apir!