Walang tinitigasan sa post na ‘to, sos. Naisip ko lang na ganyan ang basa ng mga Hapones sa salitang election. Yung mga kakandidato siguro marami na ang tinitigasan sa kanila. Sobrang excited na manalo. Sobrang excited na sa pangangampanya. Isang taon pa ang eleksyon pero nandyan na ang mga pagpapasikat at pagpapayabang kabi-kabila. Meron na ding naglalaglagan ng mga dating kaibigan. At merong nagsasanib-pwersa para sure win ang partido nila.

Hindi ako madalas manood ng tv kaya ganun na lang ang aking pag-iisip ng mapanood ko ang mga pakulo ng mga kakandidato sa isang taon. Sa mga napanood kong pangangampanya, ang tema ng lahat ay dapat iboto n’yo ako dahil mahirap ako dati. Isa-isahin natin.

Si Villar ay laking Tondo. Syempre pag sinabing Tondo, una nang pumapasok sa isip naten ay ang napakaraming squatters at kung anu-anong krimen. Butas ang bubong ng bahay nina Villar dati, kawawa naman. Kaya nung yumaman sya, namigay sya ng mga bahay sa mahihirap.

Etong si Roxas (oo, alam ko di na sya tatakbo) naman e nag-upgrade mula sa Mr. Palengke sa pagiging Boy Padyak. Sa campaign ad ay makikitang pinagmaneho nya ng pedicab ang dalawang bata dahil hirap sila sa buhay.

Itong si Binay naman (oo sya ren wala na daw) e pulubi nung bata pa. Tapos yung mga friends nya e pinagtatawanan sya pag dumadaan at nakikita syang naglilinis ng kulungan ng baboy. Pero nangarap sya na uunlad ang buhay at ngayon mayor na sya ng Makati.

Tapos yung kay Fernando wala kase akong makita e. Pero isipin nyo na lang na nakikibarkada sya sa mga tropa ng mga construction workers at mga urban workers. Tapos poging pogi sya.

Pangsasamantala sa sikolohiya ng mahihirap na mamamayan ang nakikita nilang epektibong paraan para ibenta ang sarili nila. Kaya gagastos sila ng libo at milyon para magbayad sa paggawa at pagpapalabas ng mga commercial nila para sila na mismo ang magsabi sa mga Pilipino na iboto sila.

Sa tingin ko kase, kung totoo kang lingkod ng bayan, hindi mo na pinangangalandakan sa mga tao na tumutulong ka sa kanila. Dahil yan talaga ang trabaho mo. Kung ikaw ba nasa isang opisina, pinagmamayabang mo ba sa mga katrabaho at kliyente mo na ginagawa mo ang trabaho mo? Hindi. Dahil inaasahan na yun. Dapat mo talagang gawin yun. Ngayon kung gusto mo ng extra credit at paghanga ng mga tao, gumawa ka ng sakripisyo para sa trabaho mo. Magbigay ng tulong galing sa sariling bulsa, wag maglagay ng kung anu-anong shit na nagsasabing proyekto mo yung ginagawang tulay,? at maging simple sa pamumuhay. Dati ko pa nga iniisip na kapag naging politiko e dapat nagiging mas mahirap ang buhay. Pero hinde, dahil dito sa atin, pag politiko e lalong yumayaman kahit mas mataas pa ang sweldo ng mga nasa call center sa kanila.

Sa totoo lang, wala na akong mapagkatiwalaang politiko ngayon. Wala akong makitang dapat na iboto. Dito kase sa bayan natin, hindi na batayan kung sino ba sa mga kumakandidato ang hindi magnanakaw sa bayan. Ang tanong na natin ay sino ang pinaka-konti ang nanakawin?

Apir!