Nakailang remake na ba ng Darna? Di na tayo makasagot ng isa o dalawa ano? Yan ay dahil di na natin tanda kung ilang beses na pinagpiyestahan ng mga producers ang kwentong ito dahil sa kakulangan nila sa pag-iisip ng matinong kwento. Kelan lang natapos yung Darna na tinampukan ng katawan ni Angel Locsin ah. Tapos ngayon eto at katawan naman ni Marian Rivera ang ibabandera sa mga telebisyon sa buong Pilipinas. Parehong katauhan, ganun din ang plot, ganun din ang kwento. Hoy, mga may-ari ng estasyon ng telebisyon: meron pa bang nag-iisip dyan sa mga studio ninyo? Yung Dyesebel kaya, kelan ulit ang remake?

Pero seryoso talaga, walang matinong palabas ngayon na series dito sa Pinas. Kung hindi mga tinagalog na kwentong Koreano e mga plot na kinuha pa sa baul ng mga ninuno ni Lola Basyang. Parati na lang sa mga kwento ng mga series dito sa atin e may mga goons na bobo, mayayamang masasama ang ugali, mga ulila na nagiging mayaman sa huli, kasalan ng bida at leading lady sa huli, natatagpuan ang mga nawawalang anak, at kung anu-ano pang mga twist kuno na sa pilot episode pa lang e alam mo nang yun ang mangyayare. Naiisip ko nga e baka nag-pot session minsan ang mga writers sa mga tv series tapos kung anu-anong ka-estupido-han ang nagawa nilang mga kwento.

Bakit ba wala man lang nakakaisip na gastusin ng tama yung perang nakalaan para sa produksyon ng isang tv series? O kahit ng isang pelikula. Natatandaan ko e gumastos sila ng pagkalaki-laki para lang makapag-shooting sa Dubai, sa Amerika, sa Italy at kung saan-saang bansa. Pero yung kwento e napaka-generic pa ren. Walang pinagkaiba sa mga nagawa nang pelikulang Pinoy. E bakit kaya hindi na lang gastusin yung perang yun sa disenteng manunulat ng kwento? O kaya sa totoong special effects? At wag nilang sasabihin na hindi pa natin kaya ang ganung teknolohiya. Pakshet yan. Ang gaganda ng mga effects sa mga commercials sa tv na nakikita ko. E kung pinopondohan nila na i-apply ang mga ganung effects sa pelikula o sa tv series e di mas mataas ang entertainment value. O kaya umarkila naman ng totoong stunt coordinator. Potakteng mga stunts na pinapakita yan, mas nakakaaliw pang alalahanin yung suntukan namin ng kaklase ko sa bubong ng school nung elementary days.

Palibhasa kase e benta na sa karamihan sa masang Pinoy na puro mabababaw ang taste. Oo, kinukutya ko talaga ang kababawan ng taste ng masa. Akalain mong yung konting gusot ang mukha ng isang komedyante e sakit na ang tyan katatawa ng mga masang Pinoy, hindi ba naman kababawan yun. Taasan nyo naman ang mga standards nyo, para matuto ren itong mga producers natin. O kaya kayong mga producers e magkusang gumawa ng matitinong palabas. At baka makabili pa ako ng tv ng dahil lang sa inyo.

Apir!